JK Rowling help my grootword

Ek is deel van die Harry Potter generasie en trots daarop!

Ek was nooit regtig lief daarvoor om ‘n boek op te tel en te lees nie, maar toe die eerste Harry Potter boek verskyn het, het ek wintersnagte onder my kombers gelê met ‘n klein flitsie, want dit kon darem nie wag tot die volgende oggend nie.  Onmiddelik was ek lief vir die karakters, vir die beskrywende manier waarop J.K Rowling geskryf het en in die aande kon ek droom van al die goed wat in Hogwarts afspeel.

Later is my vingers en hande yskoud soos ek aan die boek vasklou en vir so ‘n paar sekondes is ek bekommerd oor hoé op aarde ek die volgende dag gaan kan wakker bly by die skool as ek die hele nag lê en lees.  Die volgende oggend kan ek nie wag om my ma te vertel wat ek die aand gelees het nie.  Ek vertel dit so in detail dat my ma saam met my opgewonde raak en ook haar eie verbeelding gebruik om voor te stel hoe die karakters lyk.

J.K Rowling het soos Magda van Biljon van Wielie Walie gehelp om my groot te maak.  Die dae wat ek omgekrap was of ongelukkig was, het ek geweet Harry, Ron en Harmione sal my met ope arms troos.

‘n Paar interessante feite oor J.K Rowling:

  • Sy het Harry Potter and the Philospher’s Stone op ‘n tikmasjien getik.
  • Voor sy die boeke klaar geskryf het, het sy eers al die geheime met Alan Rickman gedeel sodat hy die beste Severus Snape kon wees.
  • Harry Potter en JK Rowling se verjaarsdae is op 31 Julie.
  • Sy het die idee vir die Harry Potter boeke gekry op ‘n treinrit van Manchester na Londen.  Op die rit het sy reeds die karaktername Ron, Peeves en Nearly Headless Nick op ‘n servet neergepen.
  • 12 uitgewers het JK Rowling weggewys en so het Bloomsburry uiteindelik besluit om Harry Potter en JK Rowling ‘n kans te gee.

JK Rowling se nuwe boek The Casual Vacancy word op 27 September 2012 vrygestel.

Bronne: Jack Oceano (Yahoo Network) en Huffingtonpost.co.uk

Advertisements

Vreugde ná groot slag vir seuntjie

Nie lank na ek by klein Israel was nie, is ek weer op pad na ‘n gestremde seuntjie toe.  Hierdie keer is dit klein Seth Fourie van Kempton Park. Die vyfjarige seuntjie se serebrale gestremdheid is toe te skryf aan die nalatigheid van personeellede in die Eden­vale-hospitaal op die dag van sy geboorte, het die hof beslis.

Ek, die verslaggewer en die fotograaf was nie seker wat om te verwag nie (nadat ek en die fotograaf net die vorige week by klein Israel was) en ons is maar stil in die kar terwyl ons ry.  Toe ons daar kom maak ‘n aantreklike man die hek vir ons oop, sy oë blink en hy glimlag en nooi ons in.  Binne wag Seth se ma vir ons met Seth op haar skoot.  Hy is nou vyf jaar oud en is baie skaam vir my videokamera, so ek staan maar stilletjies aan die een kant terwyl ons verslaggewer met sy mamma en pappa gesels.  Die storie wat sy vertel het, het amper veroorsaak dat ek my kamera laat val van skok.  Arme Seth het na ‘n baie lang kraam sy verskyning gemaak op sy ma se  verjaarsdag – maar dit nadat ‘n verpleegster op sy ma se maag gespring het om die kraam aan te help – min het hulle geweet of omgegee dat die naelstring om Seth se nek was en hy al ‘n hele ruk sonder suurstof was.  Seth se pa het vertel hoe hulle sy seuntjie uiteindelik aan sy nek uitgetrek het.

Die dierbaarste seuntjie het kort-kort vir my geloer en skaam geglimlag as hy sien ek kyk vir hom.  Net voor ons geloop het, het hy en sy hond Blits bietjie op die gras gespeel.  Hy kan nie loop nie en spring of kruip so half waar hy wil wees.  “Hy is ‘n gelukkige seuntjie, want volgens hom is hy ‘n gewone seuntjie” – vertel sy pa.

Kyk hier na die onderhoud met sy ma en pa waar hulle vertel van die dag van Seth se geboorte.

Baba Israel Se Storie

Ek dink van al die stories wat ek al vir Beeld gedoen het, het die een my die meeste ontstel en daar is aande wat ek wakker lê en wonder hoe dit met die ou mensie gaan.  Dis reg, Israel is ‘n mensie.  Hy is opgeneem in die hospitaal as ‘n doodgewone seuntjie toe hy net 18 maande oud was vir kroep en dit was die einde van Israel soos sy ma en pa hom geken het.  Israel se toestand het skielik versleg en weens swak dienslewering in die hospitaal het sy suurstofbuis verstop, niemand het agtergekom nie en hy was sonder suurstof en het reeds breinskade opgedoen. Israel is wel nou vier jaar oud, maar as jy na hom kyk is sy 9 maande oue boetie net so ver ontwikkel soos hy.

Ek dink wat die ergste was vir my was om sy ma se moedelose oë te sien.  Om rond te kyk in hulle klein huisie wat hulle met soveel ander mense deel en te sien hoe hulle sukkel.  Hoe Israel se ma hom moet optel en dra, hom moet voer terwyl sy na die foto van ‘n gesonde Israel op die muur staar.  Hulle het die eis gewen teen die staat en behoort ‘n geldjie te kry wat dinge seker beter sal maak, wanneer…. dit weet ek nie.

My hart word sommer seer terwyl ek hier tik.  Kyk na my video oor klein Israel.

[foto: Cornel van Heerden]

Uile skrop nes op Sandton Sun-hotel se dak

Vier gevlekte ooruile het vandeesweek nesgeskrop op die dak van die Sandton Sun-hotel in Johannesburg. Mnr. Brendan Murray van Broederstroom het dié uile, gebore in Johannesburg, as kuikens grootgemaak, leer jag en vrygelaat.

Chris glimlag weer

Chris Rossouw, die seuntjie wie se pa op die ouderdom van 2 per ongeluk oor hom gery het, word more vir die laaste keer geopereer. Chris se gesiggie was vir vier jaar lank verlam totdat die Smile-stigting in samewerking met die Charlotte Maxeke-hospitaal ‘n peperduur reanimasie-operasie op hom gedoen het. Hy het net na Kersfees vir die eerste keer weer begin glimlag en more word ‘n gewiggie in sy regteroog ingeplant wat sal help dat hy dié oog heeltemal kan toemaak.  Lees Pauli van Wyk se berig hier.

Sipho Hotstix, skolier op 60